Xaaf iyo Farmaajo oo fashil kusoo dhamaaday kulan ay yeesheen

826

Kulan Saacado badan qaatay Magaalada Garowe ee Caasimadda Puntland ku dhexmaray Madaxweynaha Soomaaliya Maxamed Cabdullaahi Farmaajo iyo Madaxweynaha Galmudug Axmed Ducaalle Geelle Xaaf ayaa kusoo dhamaaday Fashil ka dib markii labada dhinac ay heshiis gaari waayeen.

Madaxweyne Farmaajo ayaa soo jeediyay sidda ay Risaala u xaqiijiyeen Mas’uuliyiin ku dhow Madaxweyne Xaaf in Muddo kordhin hal sano ah loo sameeyo maamulka Galmudug oo baarlamaanka Galmudug uu ku shaqeeyo Cadaado uuna hoggaaminaayo Cali Gacal Casir.

Madaxweyne Xaaf ayaa ku gacanseyray dhammaan dalabaadka Madaxweyne Farmaajo , waxaana uu ku adkeystay in Galmudug leedahay Dastuur iyo baarlamaan uu fadhigoodu yahay Magaalada Dhuusamareeb, islamarkaana wixii muddo kordhin ah ay u taallo baarlamaanka.

Xaaf ayaa Madaxweyne Farmaajo ka dalbaday in maamulkiisa laga qaado Cunaqabateynta , islamarkaana loo fasaxo dhaqaallaha ka xayiran oo kaliyah laakiin uusan qaadi karin wax kale oo aysan ogeyn baarlamaanka Galmudug.

Madaxweyne Farmaajo ayaa ballanqaaday in uu fasixi doono dhaqaallaha ka xayiran maamulka Galmudug ee dhanka dowladda dhexe ee Soomaaliya, islamarkaana Madaxweyne Xaaf laga rabo in uu aqbalo muddo kordhin hal sano ah oo joojiyo dalabaadkiisa Afarta Sano ah.

Kulanka ayaa kusoo dhammaaday Fashil , waxaana lagu ballamay kulan kale oo ay goobjoog ka noqon doonaan Madaxda maamul goboleedyadda.